Fantasma Accidental, o programa sobre a música contemporánea galega e as súas conexións, remata a súa primeira tempada da nova etapa en CUAC FM. Queremos celebrar este punto e aparte cun concerto no que presentaremos a dúas prometedoras formacións. As bandas que máis darán que falar na cidade da Coruña nos próximos tempos: Primrose e Lady Leño.
Dúas, e moi novas, formacións xurdidas na cidade herculina neste efervescente panorama musical galego onde este programa busca eses accidentes chamados música.
Os concertos terán lugar o venres 14 de xuño na sala LeClub.
Apertura de portas as 21:30, entrada 5€.
LADY LEÑO
A escuridade e a contundencia dunha banda que podería formar parte dos inicios dos selos GASA e DRO. Os inicios do afterpunk que xuntaba a expresividade propiciada polo DIY e a visión crítica ante unha sociedade decadente. Unha banda que podería emparentarse con aquelas bandas que se empaparon de Joy Division, The Cure ou Bauhaus para concibir as sinistras formas de Décima Víctima ou Parálisis Permanente, e a moi reivindicable encarnación de Ana Curra con Los Seres Vacios.
Lady Leño, nome e inspiración en David Lynch, son as sinistras guitarras de Iago Golpe, a batería punk de Alberto Vázquez, coñecido debuxante ademais de militar nos distópicos Mano de Obra, e o baixo e grave voz de Bea Argüelles. Coa súa primeira demo, gravada nos estudios Abrigueiro de Arturo Vaquero, remiten a frías estancias onde a xenreira estala en diatribas como “yo construyo puertas/que me sirvan para escapar/las demás fabricáis ventanas/que sirvan para esperar” (Arquitecta).
PRIMROSE
Este trío de A Coruña parece seguir os designios musicais das bandas postpunk dos inicios do selo 4AD. Escuridade con bases de electrónica, baixos de grave presencia, guitarras máis suxeridas que mostradas e a melancolía da voz envolta en reverb. Dreampop e plácidos ambientes que se tornan inhóspitos cando se asoman ao seu abismo. Dende as catacumbas onde Cocteau Twins respiraban beleza e os primeiros e lutuosos Modern English explicaban a modernidade. Cando novas formas de expresión foron saíndo á superficie para que bandas como Hugo Largo lles deran forma, e acabaran reencarnándose nunha pequena cidade cercana a Bristol chamada Portishead onde atopamos un novo, e industrial, blues.
Descubrimos en “Serial Love”, primeira gravación de Primrose, a Eugenia Sánchez na penumbra da súa voz xunto a David Vázquez, membro do dúo Light Emitting Diode (LED) e máis en solitario, nas planeadoras guitarras. Pecha o trío Roberto Casteleiro, coñecido por ser parte de Fagot y Popota e os seus heterónimos Koroiev, Korokati e Federico Flesfa.
LEMUR DJ
Factotum deste programa, pinchará música nunha viaxe de ida e volta no tempo e no espazo para que boten os lemures. Unha selección de post, after e pre punk. Dende a apertura de portas e despois do concerto.